Hvað er eikynhneigð (asexual)?

Eikynhneigð er þegar einstaklingur laðast lítið eða ekkert kynferðislega að öðrum. Þetta er ekkert flóknara en það.

Mismunandi tegundir aðlöðunar

Eins og komið hefur fram laðast eikynhneigðir lítið eða ekkert kynferðislega að öðrum. Eikynhneigðir geta þó laðast að öðrum á líkamlegan og rómantískan máta. Kynferðisleg, líkamleg og rómantísk aðlöðun eru aðskildar aðlaðanir. Því getur eikynhneigður einstaklingur verið gagnrómantískur, samrómantískur, tvírómantískur, panrómantískur, eirómantískur og svo framvegis.

Litróf eikynhneigðar

Eikynhneigð er skali og nær því yfir nokkur önnur hugtök. Sumir gætu t.d. hugsað sér að stunda kynlíf en aðrir alls ekki. Sumir eikynhneigðir stunda kynlíf af allskonar ástæðum allt frá því að það sé fyrir maka eða til að búa til börn, yfir í að finnast það hreinlega gaman. Það eru margir undirflokkar eikynhneigðar en t.d. má nefna eftirfarandi:

Grákynhneigður (e. graysexual, gray asexual)

Þeir sem finna fyrir lítilli kynferðislegri aðlöðun en finna hana þó stundum.

Demisexual

Þeir sem finna aðeins fyrir kynferðislegri aðlöðun ef búið er að byggja upp tilfinningalegt samband fyrst.

Hvernig veistu að þú ert eikynhneigð/t/ur?

Þessu verður hver og einn að svara fyrir sig sjálfan. Einfaldasta spurningin er auðvitað "Finnurðu fyrir kynferðislegri aðlöðun?", ef nei þá ertu eikynhneigð/t/ur. En að svara þessari spurningu er oft erfitt sérstaklega ef þú hefur aldrei fundið fyrir því og veist í raun ekki hver tilfinningin er. Hérna eru nokkrar spurningar sem þú getur spurt sjálfan þig:

• • Hefurðu almennt ekki áhuga á kynlífi?

  • Finnst þér kynlíf í samböndum vera meira kvöð en eitthvað skemmtilegt?

  • Horfirðu á kynlíf frekar með vísindalegum augum en tilfinningalegum?

  • Finnst þér þú ekki skilja allt sem fólk talar um þegar kynlíf er rætt? 

  • Þegar þú stundar kynlíf er það bara meh... eða eins frábært og aðrir segja að það sé?

  • Finnst þér fólk vera að ýkja þegar það talar um hversu mikið það elskar kynlíf?

  • Hefurðu þóst hafa áhuga á einhverjum kynferðislega til að passa inn í hópinn?

  • Finnst þér þú brotinn eða eitthvað að þér kynferðislega? Eins og þú þurfir að fara til læknis eða finna út úr þessu?

  • Hefurðu stundað kynlíf því þér finnst þú ættir að gera það frekar en að þú vildir gera það?

Algengar spurningar

Hér má svo finna margar algengar spurningar varðandi eikynhneigð. Lærðu það hér svo þú þurfir ekki að spyrja.

Eru eikynhneigðir ekki bara skírlífir?

Nei, eikynhneigð er ekki val. Ef við tökum súkkulaði sem dæmi í stað kynlífs. Eikynhneigðum langar bara ekkert í súkkulaði, þeir sem eru skírlífir langar í súkkulaði en kjósa að fá sér ekki súkkulaði.

Þarftu ekki bara að kíkja til læknis? Er þetta ekki bara hormónaójafnvægi? Kannski ertu bara getulaus?

Nei, engin tenging er á milli neins líkamlegs áfalls né sjúkdóms og eikynhneigðar, ekki frekar en gagnkynhneigðar, samkynhneigðar eða annarra hneigða. Heilbrigði kynfæra er óháð kynhneigð og kemur því eikynhneigð ekkert við.

Kom ekki bara e-ð fyrir þig? Þarftu ekki að fara til sálfræðings?

Nei, engin tenging er á milli andlegra áfalla né sjúkdóma og eikynhneigðar, ekki frekar en gagnkynhneigðar, samkynhneigðar eða annarra hneigða.

Ertu ekki bara hrædd/tt/ur við að stunda kynlíf?

Nei, margir eikynhneigðir stunda kynlíf af allskonar ástæðum, þeir laðast bara lítið eða ekkert að öðrum. Hvað þú gerir segir ekki til um kynhneigð þína.

En þú sagðir að þessi væri sæt/t/ur, hvaða máli skiptir hvernig viðkomandi lítur út ef þú ert eikynhneigð/t/ur?

Eikynhneigðir geta laðast líkamlega að öðrum, þótt aðrir sætir, fallegir og svo framvegis en samt ekki laðast að þeim kynferðislega.

Hvernig eru rómantísk sambönd frábrugðin vinasamböndum? Eru rómantísk sambönd ekki bara vinasambönd með kynlífi?

Rétt eins og fólk getur stundað kynlíf án rómantískra tilfinninga geta einstaklingar verið í rómantískum samböndum án kynlífs. Tilfinningar eru mismunandi milli einstaklinga og ást er mismunandi. Vina ást, mömmu ást, pabba ást, maka ást, allskonar ást. Vinaást er ekkert minna merkileg en rómantísk ást en það er vissulega munur. Ekki allir finna þó fyrir þessum mun og því eiga sumir erfitt með að skilja muninn þar af því þeir hreinlega upplifa hann ekki.

Stunda eikynhneigðir sjálfsfróun?

Eikynhneigðir geta haft mikla kynhvöt og stunda því jafnvel sjálfsfróun, sumir gera það einfaldlega af því það er gott, sumir gera það ekki.

Stunda eikynhneigðir kynlíf?

Sumir gera það fyrir makann sinn, sumir til að eignast börn og sumir einfaldlega af því það er gott. Sumir hafa bara engan áhuga á því og sleppa því.

Hvernig veistu að þú sért eikynhneigð/t/ur ef þú hefur ekki prófað?

Ert þú búin að prófa kynlíf með kyni sem þú laðast ekki að? Ekki? Hvernig veistu þá að þú laðist ekki kynferðislega að því? Þú bara veist það, eikynhneigðir vita það líka.

Þetta er bara ekki rökrétt, ef væri ekki fyrir kynlíf væri mannkynið útdautt! Maðurinn verður að stunda kynlíf!

Það eru til eikynhneigðir sem vilja eignast börn og jafnvel stunda kynlíf til þess eða skoða kannski frekar tæknifrjóvgun eða aðra möguleika. Einnig eru til aðilar sem eru gagnkynhneigðir sem vilja ekki börn.

Þú bjóst bara til þetta orð af því þú ert svo óaðlaðandi að það vill enginn vera með þér!

Útlit og kynferðisleg aðlöðun eru aðskildir hlutir. Þó þú tengir kynhneigð viðkomandi við að viðkomandi eigi að líta út á vissan hátt og hegða sér á vissan hátt er það bara ekki þannig, það er bara staðalímynd sem er ótengd raunveruleikanum. Eikynhneigðir geta verið "sexy" og aðlaðandi. Aðrir geta laðast að þeim kynferðislega þó eikynhneigðir laðist ekki að öðrum kynferðislega.

Borða eikynhneigðir ananas á pizzu?

Svarið við flestum spurningum um eikynhneigða er "Sumir gera það, aðrir ekki". Að vera eikynhneigður skilgreinir þig ekki sem einstakling, það er bara partur af manni, við erum öll einstaklingar og erum jafn mismunandi og við erum mörg.